Leikurin Lykkenborg er ein perla, sum við beinraknari kompositión og í hárfínari javnvág fær drigið áskoðaran inn í eina verð, sum er trúlig og ótrúlig samstundis. Smáu brotini byggja søguna upp petti fyri petti, eins og Lykkenborg varð bygd. Afturvendandi temuni minna okkum á, at alt er ikki ein bein strika, men kemur aftur og aftur í ymiskum skapum. Heilt frá skúlastovuni til lidnu borgina, frá innastu kenslunum til ráastu hendingarnar á Rødbygård.
Leikurin og
samleikurin syrgja fyri, at vit ongantíð missa tráðin og alla tíðina eru fangað
í søguni. Fjølbroytta ljóðmyndin, einfalda og tó djúpa pallmyndin skapa saman
við leitandi og ófrættakenda ljósspælinum karmar, sum undirbyggja og styrkja
søguna uttan at yvirtaka ella doyva leikin.
Fyri nøkrum vikum
síðani visti eg einki um Lykkenborg. Einki um Pól Johannus, lítið og einki
um Rødbygaard og als einki um sálarstøðuna og hugsunarháttin hjá einum
‘serskølti’ fyri 80 árum síðan. Eftir at hava sæð leikin Lykkenborg í
Listastovuni í Miðvági, kenni eg meg munandi meira vitandi um øll hesi
viðurskiftini. Hetta eru viðurskifti, ið vit øll hava gott av at verða ámint um og vita nakað um.
Eisini í 2022, tí fólk, ið hugsa øðrvísi enn fjøldin, liva eisini á okkara
døgum. Tíbetur.
Søgan um Pól Jóhannus er eitt framúr val at pallseta. Hon er føroysk, hon er serstøk, og hon er verulig. Men
samstundis hevur hon passaliga søguliga fjarstøðu, so hon kann standa sterk og
sjálvstøðug. At leggja dentin á búningarárini frá 13 til umleið 20 er genialt.
Freistingin at leggja dent á barnaárini og kanska serliga árini, tá Lykkenborg
bleiv bygd, hevur ivaleyst verið stór. Við júst at minimera søgugongdina til
hesi umleið 7 árini, megnar leikurin at skapa nakað heilt serstakt og inniligt. Vit
sleppa í dýpdina, og úr henni fær áskoðarin nógv gott tilfar til at byggja sína egnu
verð og sína egnu Lykkenborg.
Í leikskránni sigur høvuðsleikarnin Kristina Sørensen Ougaard: Hvat hevði verðin ikki verið fátøk og keðilig uttan tað skeiva, óperfekta, litfagra, øðrvísi, tilvildarliga og allar teir fløkjasligu hurlivasarnar - sum vit øll jú eru! og samstundis verður eysturríski arkitekturin Friedensreich Hundertwasser siteraður fyri "The straight line leads to the downfall of humanity."
Takk til fólkini
handan Die Ferösche Compagnie, takk Kristina, Búi og Dánjal fyri
hesa stóru og inniligu sjónleikauppliving og áminning.
Comments
Post a Comment