Skip to main content

Ókeypis føroyskar orðabøkur til allan heimin

Far inn á www.islex.is. Far inn á www.ordnet.dk, www.translate.google.dk ella kanska www.obg.fo, so sært tú, hvussu málslig amboð kunnu verða umsitin og veitt brúkarunum á netinum – ókeypis.

Netið er ókeypis, og tað er tað, sum fólk rokna við. Eru slíkar tænastur ikki ókeypis, verða tær ikki brúktar.

 

Føroya fólk, sum umvegis skatt og avgjøld longu hevur goldið fyri menningina av flestu orðabókunum, hevur krav upp á ókeypis orðabókatænastu á netinum. Óansæð um tey ganga í hesum ella hasum skúlanum ella búgva í hesari ella hasari kommununi. So einfalt er tað. Men sjálvandi kosta slíkar skipanir nakað av peningi. Tað ger telduskipanin hjá eitt nú TAKS, sjúkrahúsverkinum, almannaverkinum, Mentamálaráðnum, løgtinginum ella Tórshavnar kommunu eisini.

 

Tí er mín stutta áheitan á landsins kosnu politikarar: “Farið inn í fíggjarlógina nú millum 2. og 3. viðgerð og finnið tær krónurnar, sum skulu til at røkja ein føroyskan orðabókaportal. Tá hevur allur heimurin atgongd til føroysku orðabøkurnar – ókeypis. Alt annað er at arbeiða móti tíðarandanum og gera seg inn á menningina av okkara móðurmáli.

 

Hetta er ikki ein spurningur um tvídrátt og gamalt agg millum land og kommunur. Hetta er ein spurningur um virðing fyri móðurmálinum í 2014 og frameftir.

 

Sjáldan hava so fáar krónur kunnað munað so nógv fyri so mong. So her hava okkara fólkavaldu veruliga møguleika at vísa evnini at fremja tiltøk í tøkum tíma.

 

Hetta hevði heilt víst verið ein av søtastu og skilabestu pakkunum at lagt undir hvørt einasta jólatræ í ár og mong ár framyvir. Og pakkin kostar sum skilst í mesta lagi hálva aðru piparnøt.

Labels:

Comments

Post a Comment

Popular posts from this blog

Ein føroysk dystopi

  Í summar kom út bókin Dreymsótt eftir Rakel Helmsdal, og lat tað vera sagt alt fyri eitt, at tað var ein fragd at lesa skaldsøguna . Dreymsótt er ein óunnilig  frásøgn úr framtíðini, ein sokallað dystopi ella marruskaldsøga. Í onkrum av heimsins pørtum er bókin kanska meira veruleikakend enn í øðrum, men í Føroyum eru hendingarnar tíbetur dystopiskar enn.   Evnini, sum høvundurin viðger, eru, eins og vanligt er í slíkum skaldsøgum, í stóran mun politiskt tengd. Ein forsøgn um, hvat kann hendan, um vit halda fram sum nú, og harvið ein harður kritikkur av dagsins samfelag.   Tráanin eftir óavmarkaðum valdi, møguleikarnir tøknin gevur slíkari tráan og langtíðaravleiðingarnar, ið maktgirnd hevur fyri fólk og samfelag, eru millum hesi evni. Frælsi mótvegis ófrælsi er gjøgnumgangandi temað í bókini. Bókin tekur støði í dagsins avbjóðingum og spurningum og málar eina døkka framtíð, um vit kritikkleyst góðtaka tíðarinnar rák.   Tá tú lesur eina slíka spenn...
Post a Comment
Les víðari »

Føroyskt er eisini eitt fremmandamál

At lata sum um føroyskt er lætt hjá øðrum at læra, og at arbeiðsplássið, makin ella kommunali kvøldskúlin einsamøll loysa avbjóðingina, er naivt og kostar dýrt. Bæði her og nú fyri einstaklingin, sum hevur valt sær Føroyar sum sítt heim, og í longri høpi fyri samfelagið, sum gjarna skal inkludera og fáa gagn av teimum førleikum og møguleikum, ið hvør einstakur av okkum í breiðastu merking hevur. Hyggja vit í t.d. byggivinnuna, flakavirkisvinnuna og ferðavinnuna, so liggur parturin ikki eftir hjá teimum, sum hava eina aðra málsliga bakgrund enn ta føroysku. Tey eru mestur eisini Føroya fólk – ella hvussu?
Post a Comment
Les víðari »

Lykkenborg

Leikurin Lykkenborg er ein perla, sum við beinraknari kompositión og í hárfínari javnvág fær drigið áskoðaran inn í eina verð, sum er trúlig og ótrúlig samstundis. Smáu brotini byggja søguna upp petti fyri petti, eins og Lykkenborg varð bygd. Afturvendandi temuni minna okkum á, at alt er ikki ein bein strika, men kemur aftur og aftur í ymiskum skapum. Heilt frá skúlastovuni til lidnu borgina, frá innastu kenslunum til ráastu hendingarnar á Rødbygård. Leikurin og samleikurin syrgja fyri, at vit ongantíð missa tráðin og alla tíðina eru fangað í søguni. Fjølbroytta ljóðmyndin, einfalda og tó djúpa pallmyndin skapa saman við leitandi og ófrættakenda ljósspælinum karmar, sum undirbyggja og styrkja søguna uttan at yvirtaka ella doyva leikin. Fyri nøkrum vikum síðani visti eg einki um Lykkenborg . Einki um Pól Johannus, lítið og einki um Rødbygaard og als einki um sálarstøðuna og hugsunarháttin hjá einum ‘serskølti’ fyri 80 árum síðan. Eftir at hava sæð leikin Lykkenborg í Listastovuni í...
Post a Comment
Les víðari »